आफै बोक्शि । आफै धामी । हो यसलाई दुरुस्तै व्यवहारमा उतारेका छन् सुन पसलका साहु विनोद सुनारले ।

 आफ्नो पसलमा आफै चोर बनेर चोरी गरे । यतिमात्र होईन उनले पसल चोरी भयो भन्दै अनेक नाटक गरेर प्रहरीमा उजुरी दिए त्यसपश्चात चोरीको रकम २ करोड भन्दा बढि बिमा रकम दाबिपनि गरे । सुन्दै अच्मम लाग्न सक्छ । कसैले आफ्नो पसलमा आफै चोरी गर्ला र ? चोरनै बन्नु थियो भने करोडौ लगानी गरेर व्यवसायपो किन गर्नु । अनि चोरीपनि आफ्नै पसलमा पो किन गर्नु । सुन्दै हाँसोको पात्र बने ति विनोद । आफ्नो पसल आफैले चोरी गरेर जेल जानुपर्ने । संचालक विनोद सहित योजनामा आवद्ध पाँच जना पक्राउ परेका छन् ।

जिल्ला प्रहरी कार्यालय भरतपुर चितवनले यही असार १ गते कालिका नगरपालिका वडा नं–६, खोलेसिमल बजारमा तेजप्रसाद खनालको घरको पहिलो तल्लामा विनोद सुनारले सञ्चालन गर्दै आएको विनोद सुनचाँदी पसलमा लुटपाट गरेको आरोपमा सञ्चालकसहित पाँच जना पक्राउ गरेको छ ।

सञ्चालक सुनारले झुटो चोरी तथा लुटपाट गर्ने योजना बनाई बिमा रकम ठगी गरी फाइदा लिने मनसायले लुटपाट गर्न लगाएको प्रहरी अनुसन्धानमा खुलेको छ । विभिन्न व्यक्तिहरुबाट लिएको ऋण रकमहरु चोरी भएको देखाई सुनारले जालसाजी गरेको प्रहरीको भनाइ छ ।

विनोद सुनारले लुटपाटको लागि पूर्णबहादुर विश्वकर्मालाई ठेक्का दिएको र पूर्णबहादुर विश्वकर्मा र पवनकुमार पासवानले राति ८ बजेर १० मिनेट जाँदाको समयमा मोटरसाइकलमा आई लुटपाट गरेको र पसलका मेनेजर विजय विश्वकर्माले चोरी गर्न आउनेलाई सहयोग गरेको प्रहरी अनुसन्धानले देखाएको छ ।

पूर्णबहादुर विश्वकर्मा र पवनकुमार पासवानले चोरी गरी लगेको सुनका गहनाहरु लुकाउनको लागि विनोदको योजनामा अञ्जना पुडासैनी केसीलाई दिएको र घटनाको दुई दिनपछि अञ्जनाको घरमा गई विनोदले उक्त सुनका गहनाहरु लिई गएको खुल्न आएको छ ।

असार १ गते अज्ञात भनिएका दुई पुरुष व्यक्तिहरु नम्बर नखुलेको मोटरसाइकल चढी आई उक्त सुनचाँदी पसलमा बसिरहेका पसल व्यवस्थापक विजय विश्वकर्मा र बापिधर गौतमलाई धारिलो हतियार खुकुरी र चक्कु घाँटीमा राखी डरत्रास धाकधम्की देखाई पसलभित्र राखिएको दुई करोड सत्र लाख चौवन्न हजार चार सय पन्ध्र रुपैयाँ बराबरको सुनचाँदी र हिराको विभिन्न डिजाइनका गरगहनाहरू लुटपाट गरिएको विवरण प्रहरीले संकलन गरेको थियो ।

प्रहरीले विनोद सुनचाँदी पसलका सञ्चालक तथा लुटपाटको मुख्य योजनाकार कालिका–६ बस्ने ३५ वर्षीय विनोद सुनार, पसलका व्यवस्थापक सहयोगी कालिका–७ बस्ने २५ वर्षीय विजय विश्वकर्मा, तनहुँको म्याग्दी गाउँपालिका वडा नं ७ का ५० वर्षीय पूर्णबहादुर विश्वकर्मा, चोरी गर्ने बारा बारागढी नगरपालिका वडा नं–४ बस्ने १८ वर्षीय पवनकुमार पासवान र कालिका ६ बस्ने ४२ वर्षीय अन्जना पुडासैनी केसीलाई पक्राउ गरेको प्रहरी प्रवक्ता प्रनाउ भेषराज रिजालले जानकारी दिए ।

Link: https://www.facebook.com/smarttvnepal79/videos/338306729318374